ПАСТАНОВА МІНІСТЭРСТВА КУЛЬТУРЫ РЭСПУБЛІКІ БЕЛАРУСЬ
4 ліпеня 2007 г. № 32
АБ ПРЫСУДЖЭННІ ДЗЯРЖАЎНЫХ СТЫПЕНДЫЙ ДЗЕЯЧАМ КУЛЬТУРЫ
І МАСТАЦТВА, ТВОРЧАЙ МОЛАДЗІ РЭСПУБЛІКІ БЕЛАРУСЬ
На падставе пастановы Савета Міністраў Рэспублікі Беларусь ад
1 чэрвеня 1994 г. № 412 «О мерах по поддержке творческой
интеллигенции Республики Беларусь» Міністэрства культуры Рэспублікі
Беларусь ПАСТАНАЎЛЯЕ:
1. Устанавіць, што:
1.1. дзяржаўныя стыпендыі (далей - стыпендыі) устанаўліваюцца
з мэтай забеспячэння дзяржаўнай падтрымкі дзеячаў культуры і
мастацтва, захавання і развіцця культурнага патэнцыялу Рэспублікі
Беларусь;
1.2. дзяржаўныя стыпендыі прысуджаюцца дзеячам культуры і
мастацтва Рэспублікі Беларусь у галіне тэатральнага, музычнага,
выяўленчага, харэаграфічнага мастацтва, народнай творчасці, кіно,
архітэктуры і дызайна, літаратуры і журналістыкі на ажыццяўленне
творчага праекта;
1.3. дзяржаўныя стыпендыі прысуджаюцца па выніках творчай
дзейнасці ў дзвюх групах:
таленавітым дзеячам культуры і мастацтва ва ўзросце да 40
гадоў;
вядомым майстрам тэатральнага, музычнага, выяўленчага,
харэаграфічнага мастацтва, народнай творчасці, кіно, архітэктуры і
дызайна, літаратуры і журналістыкі ва ўзросце звыш 40 гадоў;
1.4. дзяржаўныя стыпендыі прысуджаюцца тэрмінам на адзін год;
1.5. дзяржаўныя стыпендыі ўстанаўліваюцца ў колькасці 25 па
кожнай групе ў памерах, устаноўленых Саветам Міністраў Рэспублікі
Беларусь;
1.6. заяўкі на прысуджэнне дзяржаўных стыпендый падаюцца ў
Міністэрства культуры Рэспублікі Беларусь грамадскімі аб’яднаннямі
(творчымі саюзамі), арганізацыямі і ўстановамі культуры. Рашэнне аб
выдвіжэнні кандыдата на прысуджэнне стыпендыі прымаецца праўленнем
творчага саюза, мастацкім саветам установы культуры (сходам
працоўнага калектыву);
1.7. заяўка ўключае:
хадайніцтва грамадскага аб’яднання (творчага саюза), установы
культуры з прадстаўленнем праекта твора, на ажыццяўленне якога
выдаецца стыпендыя;
творчую біяграфію кандыдата;
пратакол пасяджэння мастацкага савета (сходу працоўнага
калектыву);
спіс творчых прац і заслуг;
пашпартныя дадзеныя кандыдата, хатні адрас і кантактныя
тэлефоны;
1.8. заяўкі на прысуджэнне дзяржаўных стыпендый падаюцца да 1
кастрычніка папярэдняга выплаце года ў камісію па прысуджэнні
дзяржаўных стыпендый (далей - камісія) Міністэрства культуры
Рэспублікі Беларусь. Камісія мае права запатрабаваць ў выпадку
неабходнасці дадатковую інфармацыю. Заяўкі, пададзеныя пасля
вызначанага тэрміну, не разглядаюцца;
1.9. камісія прызначаецца загадам Міністэрства культуры
Рэспублікі Беларусь. Рашэнне аб прысуджэнні стыпендый прымаецца
большасцю галасоў, пры роўнасці галасоў перавага аддаецца голасу
старшыні камісіі;
1.10. стыпендыі выплачваюцца за кошт сродкаў, якія штогод
прадугледжваюцца Міністэрству культуры ў рэспубліканскім бюджэце на
рэалізацыю централізаваных мерапрыемстваў;
1.11. камісія па прысуджэнні стыпендый выносіць рашэнне да 1
снежня папярэдняга выплаце года.
2. Дадзеная пастанова ўступае ў сілу пасля яе афіцыйнага
апублікавання.
Міністр У.Ф.Матвейчук
УЗГОДНЕНА
Міністр фінансаў
Рэспублікі Беларусь
М.П.Корбут
04.07.2007
|
